Монгол оронд хууль бус олборлолтоос үүдэлтэй хүний эрхийн зөрчил, хавчилга дарамтын он жилүүд ард хоцорч, бичил уурхайчид албан эдийн засагт оролцох, эрхээ баталгаажуулахад томоохон ахиц гаргаад байна.10 гаруй жилийн өмнөхөн гар аргаар ашигт малтмал олборлох нь олон нийтийн эсэргүүцэлтэй тулгарах, хууль бусаар олборлолт явуулах, хүний эрхийг зөрчих, хууль бусаар хоригдох, бие махбодийн хүчирхийлэлд өртөх, нийгмийн халамжийн наад захын үйлчилгээнээс тусгаарлагдах зэрэг байдалд хүргэдэг байлаа.

2010 оны 7-р сард  Ашигт малтмалын тухай хууль болон Газрын тухай хуульд нэмэлт өөрчлөлтүүд орж, 2010 оны 12-р сард “Бичил уурхайгаар ашигт малтмал олборлох журам” батлагдсанаар бичил уурхайн эрх зүйн зохицуулалт бий болсон. Уул уурхай, хүнд үйлдвэрийн яам болон бусад бичил уурхайн салбарын хамтрагч байгууллагуудын хамтын ажиллагааны үр дүнд Монгол Улсын Засгийн газрын 2017 оны 5 дугаар сарын 24-ны өдрийн 151 дүгээр тогтоолоор “Бичил уурхайгаар ашигт малтмал олборлох журам” шинэчлэн батласан. 2014 оны 1-р сард УИХ-ын 18-р тогтоолоор “Төрөөс эрдэс баялгийн салбарт баримтлах бодлого” /2014-2025 он/ батлагдсан. Энэхүү бодлогын баримт бичигт тусгасны дагуу Монгол Улсын Засгийн газар нь холбогдох эрх зүйн зохицуулалтаар дамжуулан бичил уурхайгаар ашигт малтмал олборлогч иргэд хууль ёсны бүтцээр хоршин ажиллахыг дэмжихээр болсон байна.