Даян дэлхийн байгаль орчны сан-гийн санхүүжилтээр НҮБ-ын Байгаль орчны хөтөлбөр, НҮБ-ын Аж үйлдвэр хөгжлийн байгууллага хамтран хэрэгжүүлж буй planetGOLD Монгол төслийг Канад Улсын Алтны бичил уурхайн зөвлөл, Байгаль орчин, аялал жуулчлалын яам нар хамтран гүйцэтгэдэг. planetGOLD Монгол төсөл нь Монгол Улсын бичил уурхайн салбарыг албажуулах, алт боловсруулахад мөнгөн усны хэрэглээг арилгах чиглэлээр ажилладаг төсөл билээ. Бид алслагдсан орон нутгийн иргэдийн амьжиргааны чухал хэсэг болох бичил уурхайн үйл ажиллагааг тогтворжуулан сайжруулах, салбарын эрх зүйн зохицуулалтыг шинэчлэхэд дэмжлэг үзүүлэх зорилгоор алтны нийлүүлэлтийн сүлжээний олон талын оролцогчид болох бичил уурхайчид, алт худалдаалагчид, улсын болон орон нутгийн засаг захиргаа болон иргэний нийгмийн байгууллагуудтай хамтран ажилладаг. Мөн түүнчлэн бид орон нутгийг хөгжүүлэх, бүтээмж дээшлүүлэх, мөнгөн усны хэрэглээг арилгах зорилгоор Монгол Улсын Засгийн газартай хамтран албажсан бичил уурхайн салбарыг хөгжүүлэхэд таатай орчныг бүрдүүлэхээр ажиллаж байна. planetGOLD Монгол төсөл Говь-Алтай, Сэлэнгэ, Ховд аймгуудад хэрэгжиж байна.
Төсөл 2024 оны эхээр дуусах бөгөөд энэ хугацаанд дараах 4 бүрэлдэхүүний дагуу ажиллана.:
- Алтны бичил уурхайн салбарыг албажуулах, хууль эрх зүйн орчин, бодлого хэрэгжүүлэлтийг шинэчлэхэд дэмжлэг үзүүлэх;
- Мөнгөн усгүй технологи нэвтрүүлэх, улмаар хөрөнгө оруулалт татах, олон улсын алтны зах зээлд шууд нэвтрэх боломжийг бичил уурхайчдад олгох санхүүжилтийн схемийг нэвтрүүлэх;
- Бичил уурхайн талбайд мөнгөн ус хэрэглэдэггүй алт боловсруулах технологийг нэвтрүүлж, дэлгэрүүлэх; болон
- planetGOLD хөтөлбөрийн хүрээнд бий болсон мэдлэг мэдээлэл, сайн туршлагыг түгээнэ.
