Анагаахын Шинжлэх Ухааны Үндэсний Их Сургуулийн НЭМС–ийн судалгааны багийн 2013 онд хийсэн “Бичил уурхай эрхлэгчид болон тэдний гэр бүлийнхний эрүүл мэндийн байдлыг үнэлэх судалгаа” үр дүнгээс харахад бичил уурхайчдын нийгмийн халамж, эрүүл мэндийн тусламж үйлчилгээ хүртээмж хангалтгүй, тэдний нэлээд хэсэг нь мэргэжлээс шалтгаалах өвчинд өртсөн ба өртөх эрсдэлд байна. Швейцарын хөгжлийн агентлагийн санхүүжилтээр бэлтгэсэн энэхүү гарын авлага нь бичил уурхай эрхлэгчдийн дунд түгээмэл тохиолдож буй өвчин болон тэдгээрийн эрсдэлт хүчин зүйлс болох архи тамхины хэрэглээ, зохисгүй хооллолтын талаар товч ойлголт өгөх, гэр бүл болон өөрийхөө эрүүл мэндийг хамгаалж, эрүүл амьдрах талаар мэдээ, мэдээлэл хүргэх, зөв зан үйл төлөвшүүлэх зорилгоор боловсруулагдсан.